Komek endamên Mekteba Siyasî ya Yekîtiya Niştimanî Kurdistanê (YNK), diyar kirin ku daxuyaniyên Celal Talabanî yên li Enqereyê ku der barê tirkmen, baasî û kurdan de dabû, nerazîbûneke mezin di nava YNK'ê derxistiye holê. Komê angaşt ku Talabanî malbata xwe, ji bo desthilatdariya YNK'ê amade dike.

Wekî tê zanîn Sekreterê Giştî yê YNK'ê Celal Talabanî hefteya derbasbûyî hatibû Enqereyê û gelek daxuyanî dabûn. Talabanî diyar kiribû ku ew dê heta dawiyê piştigiriyê bidin Eniya Tirkmenan, ew li dijî KONGRA-GEL in û li Iraqê baasî dikarin vegerin ser karên xwe...

Talabanî di nava YNK'ê de komikan çêdike

 

Endamên Mekteba Siyasî; ku nexwestin navê xwe eşkere bikin, diyar kirin ku Talabanî di nava YNK'ê de komik çêkirine û li ser hebûna wan komikan xwe bi hêz dike û wiha hate gotin: "Ev çend sal in ku em di nava Konseya Serokatiya YNK'ê de, car caran vê nîqaşê dikin ku mam Celal, daxuyaniyên gelek xirab û nesiyasî di nava Kurdistanê de bi giştî û li derveyî Kurdistanê dide. Carna çend kesek ji me dixwazin ku li hemberî Mam Celal biteqin û tiştê di hundirê dilê xwe û rêxistina YNK'ê de jê re bibêjin. Lê kes nikare zimanê xwe li hemberî wî veke. Heke hinek caran hatibe rexnekirin jî zêdetir pesnên wî hatiye dayin û dest li pişta wî hatiye dayîn. Girûbekî di nava YNK'ê de pişta YNK'ê şikandiye. Her kes dizane di nava YNK'ê de girûbên Kosret Resul, Newşîrwan Mustefa û Kak Omer Seyîd Alî hene. Gelek grûbên biçûk jî hene ku Mam Celal li jor ve wan rexne dike û di bin re jî bi awayekî dîtir ji bo wan li çepikan lêdixe. Ji ber ku di encamê de Mam Celal bihêz dikeve."

 

'Mam Celal xizmeta kê dike'

 

Di daxuyaniya endamên Mekteba Siyasî de hate gotin ku Talabanî bi gotinên xwe yên nesiyasî û yên ku xizmetî berjewendiyên hêzên kurd nakin, gelê kurd êşandiye. Li ser navê komê wiha hate gotin: "Ev daxuyaniyên ku Mam Celal dide, neyarên, YNK'ê pê bihêz dikevin û gel ji YNK'ê dûr dixin. Mînak baasiyan ew qas komkujî li ser kurdan dan meşandin, Mam Celal li hemberî wan, ji bona xweşkirina dilê wan, li kelekê ala Qazî Mûhammed, ala Iraqê ya ku baasiyan çêkiribû bilind kir. Ev siyaseta xirap a birêz Mam Celal, ji bo YNK'ê şikesteka herî mezin bû. Di nava girûba kurdan da, bi dû re ew qas pesindayina Eniya Tirkmen û dewleta tirk, ew qas hemid û sena ya ji bo Sîstanî û erebên sûnî, nayê pejirandin."

 

Desthilatdariya ferdî ya Mam Celal

 

Endamên Mekteba Siyasî, dan zanîn ku ew nikarin bi riya çapemeniyê jî dengê xwe bilind bikin û daxuyaniya wan wiha domiya: "Em dizanin ku em li hemberî desthilata ferdî ya Mam Celal tev bê çare ne. Lê belê ev nayê wê wateyê ku em nikarin tiştekî bikin. Rast e rojname, radiyo û TV nikarin ew rexne bikin, lê em di sedsala teknolojî û înternetê de dijîn. Rêxistina Ewropa û herêmên dîtir dikarin, di malperên kurdan de zexteka mezin li ser YNK'ê bidin kirin. Ev ne xiyanet e, ev kesên ku wisa difikirin em ji wan re dibêjin; Ji bo ku YNK bigihîje tiştekî rapor nivîsandina kesan xeyalekî mezin e.

 

Talabanî malbata xwe tîne ser kar

 

Koma endamên Mekteba Siyasî ku bi zimanekî tund rexne li Talabanî kir, anaşt ku Celal Talabanî hemû malbata xwe xistiye nava YNK'ê û niha jî desthilatiya YNK'ê hêdî hêdî dixe nava destê wan û YNK dewrî wan dike. Komê bang li hemû dilsozên gelê kurd ên di nava YNK'ê de kir û got: "Ey neviyên Aram, Cafer, xale Şehab, Enwer, Azad Hewramanî, Cemal Tahîr, Mame Rîşe, Selah Muhendîs û Enwer Hisên û heta dumahiyê ey kadroyên komele û dilsozên YNK'ê; werin bav hev ku em bikaribin Mam Celal bînîn ser hişên wî."

 

 

Azadiya Welat - Tayîp TEMEL